ភ្នំពេញ៖ រដ្ឋមន្រ្តីក្រសួងទេសចរណ៍ និងអនុប្រធានអចិន្រ្តៃយ៍គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) លោក ថោង ខុន បានបញ្ជាក់ថា ពលរដ្ឋខ្មែរ-បរទេសក្នុងស្រុក និងពលរដ្ឋខ្មែរនៅក្រៅប្រទេសអាចចុះឈ្មោះយកសំបុត្រចូលទស្សនាពិធីបើកព្រឹត្តិការណ៍ស៊ីហ្គេម តាមអនឡាញ SEA Games 2023 និងមកយកសំបុត្រដោយផ្ទាល់នៅពហុកីឡាដ្ឋានជាតិមរតកតេជោ។

លោក ថោង ខុន បានបញ្ជាក់ថា ចាប់ពីថ្ងៃទី២៤ ខែមេសា ឆ្នាំ២០២៣ CAMSOC នឹងបើកឱ្យដំណើរការវេបសាយអនឡាញ SEA Games 2023 សម្រាប់ឱ្យពលរដ្ឋចុះឈ្មោះយកសំបុត្រចូលរួមពិធីបើក និងបិទព្រឹត្តិការណ៍ស៊ីហ្គេម រួចហើយមកយកសំបុត្រដោយផ្ទាល់នៅពហុកីឡាដ្ឋានជាតិមរតកតេជោរហូតដល់ចុងខែមេសា ឆ្នាំ២០២៣។

លោកបញ្ជាក់ទៀតថា កម្ពុជាក៏បានត្រៀមកន្លែងសម្រាប់ពលរដ្ឋខ្មែរនៅក្រៅប្រទេសដែលអញ្ជើញមកទស្សនាព្រឹត្តិការណ៍ស៊ីហ្គេមចំនួន ៣ពាន់កន្លែងផងដែរ។ ដើម្បីទទួលបានសំបុត្រចូលទស្សនាដោយឥតគិតថ្លៃ លោក ថោង ខុនបញ្ជាក់ថា ពលរដ្ឋអាចចុះឈ្មោះតាមអនឡាញជាមុនសិន ហើយអាចពឹងពលរដ្ឋខ្មែរនៅក្នុងប្រទេសកម្ពុជាជួយយកសំបុត្រឱ្យ។

លោកថ្លែងថា៖ «បងប្អូននៅក្រៅប្រទេស បងប្អូនគ្រាន់តែ Apply តាមអនឡាញ (SEA Games 2023) មក ហើយមកឆែកយកសំបុត្រនៅមុខពហុកីឡដ្ឋានមរតកតេជោ ចាប់ពីថ្ងៃទី២៤ តទៅ។ អ៊ីចឹង បងប្អូនអាចពឹងអ្នកនៅនេះផ្ទាល់ ឲ្យមកយកសំបុត្រនៅខាងមុខពហុកីឡដ្ឋានបាន ដោយគ្រាន់តែបង្ហាញលិខិតឆ្លងដែនតាមរយៈអ្នកមកយកហ្នឹង»។

បើតាមលោក ថោង ខុន នៅពិធីបើកព្រឹត្តិការណ៍ស៊ីហ្គេមនៅថ្ងៃទី០៥ ខែឧសភា ឆ្នាំ២០២៣ ខាងមុខនេះ កម្ពុជានឹងបើកស្វាគមន៍ប្រតិភូកីឡាពលរដ្ឋចំនួន ៦ម៉ឺននាក់ចូលមកទស្សនាព្រឹត្តិការណ៍ស៊ីហ្គេមដោយផ្ទាល់នៅពហុកីឡាដ្ឋានជាតិមរតកតេជោ។

បើតាមលោក ថោង ខុន ពលរដ្ឋអាចមកយកសំបុត្រចាប់ពីម៉ោង ៨:៣០នាទី ដល់ម៉ោង ១១:៣០នាទី និងពីម៉ោង២:៣០ ដល់ម៉ោង៥:៣០នាទីល្ងាច៕